Tumhain Jaane Naheen Dain Gay

Aye Rafeek e Jaan,
Tum ne to kehne ko keh diya keh hum tumhain jaane nahin dain gay. Humaree zaat pe kya guzri yeh dekha hi nahin. Hum ne palkon pe ubhartey aansoo chupane ke liye nazrain jhuka dein aur muh phair liya tum sey. Laboun pe khileey eik masoon muskurahat damakney lagi aur dil mein eik toofan sa aa gaya. Eik gehrey saans ke baad hum ne kaha keh "accha jo hukm, magar aap udas na hon. Aisey thorey hi jain gay, aap sey ijazat lai kar jain gay hum!" Jee mein aaya keh tumhain woh baatein bataoun jo dil sargoshi mein keh raha hai, magar kahan sey shuru karti woh kissa? Socha ke baad mein, kisi khamosh tanha lamhe mein tum se yeh sab kuch kahoun gi jo tumharey ru baru kehne ki himmat nahin hoti. Humain umer bhar mohabbatoun sey do shikwey rahe hain, eik yeh keh woh hum par humaree si mukhlisi ke sath mehrbaan ho kar apna haq nahin jatatein. Aur doosra yeh keh jab woh haq jatatein hain to uss mein humaree khushi aur behtiri ka khayal shamil nahin hota. Hum sab sey belos ulfat kartey hain aur humarey yeh anmol rishtey humain bandishon aur zimmedariyon mein giraftaar kar daitey hain. Humaree murawwat ko gawara nahin keh apni mohabbatoun ka sila ya jawab mangain, magar yeh ehsas e zayan rehta hai keh humarey khwab aur khwahishain humeesha kurban kee jaati hain. Rishton ke naam badal jaatey hain magar kaid e salasil mein koi fark nahin aata!

Arrey nahin, tum paraishaan na ho, yeh koi narazgi ka izhaar nahin hai tum sey. Hum ney khud ko sapurd kiya hai tumharey, phir narazgi ka kya sawal. Magar tumhain haal e dil nahin bataein gay to kisey bataein gay? Baat yeh hai, keh dil ke eik nadaan sey hissey ko tumhara pyar sey rokna aur haq jatana bohot accha laga. humain humeesha sey khwahish thi ke koi aisa mehboob miley jo hum ko humaree tamaam danaiyon sey azad kar ke chahey. jis ki chah humain in maslahetoun sey mavra kar daaley. To jab tum mujhe apne pass rakhney ki baat kartey ho to mujhe ajeeb taskeen si hoti hai, keh jaisey mein tumhari panah mein aa gaye aur ab mujhe bahadur banney ki zaroorat hi nahin. Jee chahta hai keh na mein tumhari banhon se azadi ka sawal karoun aur na tum iss ka izn do mujhe. magar yeh to meri sadgi aur mera pyar hai jo tum sey dur nahin jaana chahta. Lekin jaan meri, mein sochti hun keh woh khwab jo mein ne tum sey pehle aur tumharey siwa dekhey thai, unka kya ho ga. Aaj meray liye tum kaafi ho, magar kal jab dil thori si azadi mangey ga, to koi udas lamha mujhe keh jaye ga keh tum ney eik chahet mein baaki sab chahatoun ko waisey ki kurban kar daala jaisey humeesha karti aayi ho. Aur mein phir sey tanha ho jaon gi apni bebasi mein. na tumhain keh sakoun gi keh tumhari ulfatoun ne go mujhe zindagi di, magar mujhe mehdood kar diya meri takmeel e zaat mein. Aur na tum sey yeh gudazi chupa sakoun gi. batao, mujhe tum sey zara sa taraddud ya doori kaisey gawara ho? Aisa koi jazba mujh mein kaisey janam lai jis sey tum ashana nahin?

mein janti hun keh tum bechain ho gaye ho meri batoun sey. Sochtey ho keh kaisey jaaney dun tumhain? Ager tum chalee gayee aur hum phir na mil sakey to mein kaisey jee paon ga iss zayan ke sath? Ager mujh sey doori mein tumhara dil badal gaya ya koi aur aa gaya tumhari zindagi mein to mein kya karounga? Mein to tum sey gila bhi nahin kar sakta, keh tumhara eik aansoo meri jaan sey barh kar anmol hai....Hai na? Ab dekho na mera pyar, keh jo baat mein ne tum sey kahe bhi nahin, uska tum kya jawab do gay woh bhi jaanti hun, phir tum kaisey kehtey ho keh kisi aur ki taraf mera dil mayal ho sakta hai. Mera dil meray pass kahan hai keh iss par mera ikhtiyar ho? Doori jitni tum par dushwar har, mujh par bhi azab ban ke guzrey gi. Jitni kurbatoun ki khwahish tumhain hai, uss sey barh kar meri chahatein bechain hain. magar phir bhi eik takaza hai tum sey. Khuda key baad, saarey zamaney mein eik tumhari zaat hai jis sey mein woh sab kuch mang sakti hun jo uska hai. Ijazat do to kuch takaza karun? Mujhe is kafas mein sey nika’l
kar dekh lainey do, mujhe eik baar apni azadi ke do pal jee lainey
do, meray chand khwabon ki tabeer ho jaane do. Uske baad eik umer parri hai jis mein hum sirf tumharey sath sath chalein gay, sirf un rahon ki chahat rakhein gay jis mein hum ikathey hun. Aur uss zindagi ka jitna intezaar tumhain hai, utni khwahish mujhe bhi hai. Mein tum sey tumhari sab sey keemti cheez mang rahe hun, magar iss wadey ke sath ke tumhari emanat mein khayanat nahin hone dun gi. Tumhara eitebaar mujhe zindagi dai ga, hosla dai ga aur jahan kabhi tanha hone lagun gi to tumharay iss namukhtatam pyar ko mehsoos kar ke jee behal jaye ga. Mein janti hun keh yeh faisla tum pe dushwar hai, magar yehi mohabbat ki meraj hai. hum apne pyaron ke liye dard aur doori bhi gawara kar laitey hain. Aur tum to humeesha mera hosla barhatey ho na, phir aaj kaisey kaho gay keh nahin, mujh sey yeh nahin ho ga. Kaisey kaho gay keh hum tumhain jaane nahin dain gay!