Ali Sardar Jafri/Aazadi

Poochhta hai too ki kab aur kis tarah aati hoon main
God main naqamiyon ke parvarish paati hoon main
Sirf woh makhsoos seene hain mire aaramghah
Aarzoo kee tarah rah jati hai jinmain ghut ke aah
Aihl-e-gham ke saath unka dard-o-gham sahti hoon main
Kanpte hothon pe bankar baddua rahti hoon main
Raqs karti hai isharon par mire maut-o-hayat
Dekhti rahti hoon main har woqt nabz-e-qaynat
Khudfarebi badhke jab banti hai aihsas-e-shaoor
Jab javan hota hai aihl-e-zar ke tevar main ghuroor
Muflisi se karte hain jab aadmeeyat ko juda
Jab lahoo peete hain tahzeeb-o-tamaddun ke khuda
Zindaghi insan ki kar deta hai jab insan haram
Jab ise qanoon-e-fitrat ka ata hota hai nam
Aharman firta hai jab apna dahan khole hue
Aasman se maut jab aati hai par tole hue
Jab kisanon ki nighahon se tapakata hai hiras
Footne lagti hai jab majdoor ke zakhmon se yaas
Sabr-e-ayyoobi ka jab labraiz hota hai suboo
Soz-e-gham se khoulta hai jab ghulamon ka lahoo
Ghasibon se badhke jab karta hai haq apna sawal
Jab nazar aata hai mazloomon ke chehron par jalal
Tafrika padta hai jab duniya main nasl-o-rang ka
Leke main aati hoon parcham inqlab-o-jang ka
Han maghar jab toot jati hai ibadis ki kamand
Jab kuchal deta hai har shai ko baghawat ka samand
Jab nigal leta hai toofan badhke kashti nooh ki
Ghut ke jab insan main rah jati hai azmat rooh ki
Door ho jati hai mazdoor ke dil ki jalan
Jab tabassum ban ke hothon par simatti hai thakan
Jab ubharta hai ufaq se zindagi ka aaftab
Jab nikharta hai lahoo ki aag mai tapkar shabab

Nasl qaumeeyat qaleesa saltnat tahzeeb rang
Rond chukti hai jab in sabko jawani ki umang
Subh ke zarron tabassum main ayan hoti hoon main
Rifat-e-arsh-e-barin se parfashan hoti hoon main

***