Shaheen... Hawa Ka Shahsawar

Kitni ajeeb kahani hai is larke ki. Jab mein ne pehli
bar unki bhoori aankhon mein khamosh sawal dekhey, to
humeesha ki tarha dil ne yeh keh ke taal diya ke iss
tarha ke khoobsoorat log risalon mein acchey lagtey
hain, inhain zindagi ke utaar charhao ka kya pata.
Rasmi si do char batoun ke baad dil bezaar ho jaata tha
unke saath, ke inhain kya maloom zeest ke gham kya hain
aur khushiyan kis keemat pe mayessar aati hain. Woh
pehli mulakaat bhi ajeeb thi. Kutb khaney ke eik goshey
mein baithey do ajnabi khamoshi se eik dosrey se mavra
apni apni kutb mein gum thai. Achanak khirki ke bahir
bacchon ke khailne aur chehekne ki awaz aane lagi.
Kahan yeh ghazab ki khamoshi aur kahan yeh shor o ghul!
Hum thehrey azad shair, jazbon ko bharpoor rang mein
jeene waley...So beskhta hans parrey is tazad par aur
iss par unhain bhi hansi aa gaye. Yun humari pehchan hui
aur rasmi salam dua hui. Woh hairan huay keh mein
doctor hun aur apne imtihaan ki tayari mein magan hun.
Aur mujhe maloom hua ke janab karobari aloom mein
masters kar rahe hain.

Phir yunhi sar e rah kabhi kabhi mulakaat hone lagi.
Kabhi duur se hi hath hila kar salam rakm karwa laitey
aur kabhi do char ilfaz takallufan keh ke hum apni apni
rah ko chal daitey. Eik baat jo mein ne us pehli
pehchan mein seekhi woh yeh thi keh mein bhi dunya
walon ki tarha logon ke chehre daikhti hun. yeh aur
baat hai keh bajai unke husn ki tareef karun, dil ka
koi hissa badguman sa ho jaata hai in parri chehron se.
Shayad is mein mujh se zayada un logon ka kasoor hai jo
mujhe zindagi mein mile aur jin ki zahiri dilkashi ne
mujhe humeesha mayus kiya. mein ne kam hi haseen log
dekhay hain jo qareeb aa ke bhi acchey lagtey hon.
mager is shaks ki ajeeb baat yeh hai keh woh jitna
kareeb aatay gaye unka zahir utna kam haseen hota gaya
aur batin utna dilkash. Lekin yeh kahani mohabbat ki
nahin, balke dosti ki hai. Yeh nazar hai eik aisey
insaan ke liye jis ne barrey dinon ke baad mujh ko
pashaimaan bhi kiya aur hairaan bhi. Zeest ke is dor
mein jab har soorat dekhi hui aur har baat sunni hui
lagti hai, yeh hawa ka naya jhonka accha laga. Yun
besakhta kuch likhna aur sochna pasand aaya.

Najane kab meri kam goye aur sadgi ne unke dil mein
jagah banaii. Eik din miley to kehne lagay keh eik
daireena zakhm hai humaray ghutne par jis mein reh reh
ke dard uthta hai. Mein dil hi dil mein muskurane lagi,
keh yun koi sar e rah milne walon ko apne masley masiil
kyun bataye ga. Behrhaal, anjaan ban ke mein ne unki
takleef suni aur dawa likh di. Phir do char mulakaton
mein iss poorani takleef ka zikr raha. Eik din jab mein
ne poocha keh kya aap ne woh dawai istamaal ki to unhon
ne sadgi se keh diya keh nahin, mein bewajah dawaiyan
nahin laita. yeh sun'na tha keh mein naraz ho gaye.
Ager aap ko meri baat sun'ii hi nahin thi to mujh se
poocha kyun? lekin aadat se majboor mein ne ghussay ka
izhaar na kiya balke dil mein thaan liya keh mein theek
thi aisey logon se duur rehne mein. yeh kya janain
murawwat aur lihaaz ko. Agli chand mulakatein zara sard
aur berabt raheen. woh bhi shayad meri badgumani dekh
ke khamosh ho gaye. Yun humari pehli narazgi bina kuch
kahe sune rakm ho gaye. Mein nahin janti keh unhain iss
maumley mein in batoun ka kitna ilm hai jo meri
hasaseeyat ne mehsoos keen, mager itna maloom hai keh
jo do'or mujhe khainch rahe thi unki taraf woh kashish
woh bhi mehsoos kar rahe thai.
Eik din mausoof ne bataya keh unhain eik bemari hai.
Dil humara bohot nadaan aur kam sin hai. Yeh baat sun
ke sochne lagi, keh leejiay eik aur kahani sunain gay
jis mein khuda jaane kitna sach hai aur kitna jhoot.
Lekin jab unhon ne tib ke paicheeda ilfaaz istamaal
karne shuru kiye to meri rooh laraz gai. Unhain eik
nayab bemari hai jis mein khoon jamaney ke khuliye kam
ho jaatey hain aur insaan ka zara zara si thais se
beshumaar khoon beh jaata hai. Yeh marz jitna sangeen
hai utna paicheeda bhi. Mein ne unhain ghutne ke liye
jo adoyaat batai theen woh unki jaan lai sakti theen.
yeh sunna tha keh mein ne shukr ada kiya keh unhon ne
meray kehne se woh dawai istimaal nahin ki. Phir kya
tha, jaisey mein makrooz ho gaye unki. Dil ne thani ke
jo nuksaan unka ho sakta tha meray hath se, uska azala
yeh hai keh unka koi barra kaam darust karun. aur kuch
nahin to eik acchi dosti ki bunyaad rakh dun. Aur yun
shuru hua is kahani ka eik naya baab.

Is ke baad hum jab bhi miley acchey doston ki tarha
miley. jab unhain koi chota barra kaam hota to keh
daitey, aur mein bina kisi taakheer ke woh kaam kar
daiti. Balke aksar milne aur baat karne mein pehel karti. Jaanti thi ke woh najaane kya sochain, mager meri zaat meray nafs se zayada meray zameer ki tabeh hai. Is asna mein maloom hua keh janab ko meri tarah ke bohot showk hain, jaisey baghbani, tasveerain jama karna, bacchon se khailna aur dost banana. Sab se barh kar mausoof Das saal tak Pakistan ki Fizaiya mein hawabaz rahe hain. Meri hairat ki inteha na rahe. Yeh sadaa sa insaan jise mein ne pehli nazar mein parakh ke nigah phair li thi, us mein itne johar posheeda hain. Mager sab se zayada khushi mujhe kal ki mulakaat mein hui. Inka apna bachpan museebat aur dard ke
thapaidon mein guzra hai. Maan baap ki shafkat aur
mohabbat faqt naam ki mili aur aksar waqt ghar se duur
hostel mein guzra. Shayad inke walidain ke masroof roz
o shab mein eik tanha udas bacchey ke liye waqt kam
tha. Unki bhoori aankhon ke khamosh sawal mein ne parh
to liye thai mager samjhe nahin thi. Aaj jab hum
daireena doston ki tarha betakalluf baithey to unki
kuch khas tasveerain dekheen aur yadein tatoleen. Jaana
keh is dilkash chehrey ke peechey eik khamosh tabeeyat
insaan hai jo mohabbaton aur sadgi ki khoj mein rehta
hai. Unke ird gird ke log jitne shokh aur chanchal
hain, woh utne hi hakeekat aashna. Aur is tamaam dard
ke bawajood yeh bahadur insaan ab bhi mohabbat karna
jantay hain, bacchon ke saath bacchay ban jaatay hain aur
hathon mein jugnu jamah kar ke roshni samaitna chahtay
hain. Accha laga yeh masoom sa paikar jo kabhi pak
fizaya ka shaheen ban jaata hai aur kabhi masoom
nigahon se dekhta baccha, jo apne hisse ki khushiyon ka
takaza kar raha hai.